ಚನ್ನಪಟ್ಟಣ:ಹೊಂಗನೂರು ಜಿಲ್ಲಾ ಪಂಚಾಯತಿ ವ್ಯಾಪ್ತಿಯಲ್ಲಿ  ತುಂಡು ಗುತ್ತಿಗೆಗಳ ಅಕ್ರಮ ಗಳು ಯಥೇಚ್ಛವಾಗಿ ಪತ್ತೆಯಾಗುತ್ತಿವೆ, ಕೆಲಸ ಮಾಡದೇ ಬಿಲ್ ಪಡೆದಿರುವುದು, ಶೇಕಡಾ ಹತ್ತರಿಂದ ಮೂವತ್ತರಷ್ಟು ಕೆಲಸ ಮಾಡಿ ಬಿಲ್ ಪಡೆದಿರುವುದು, ಸಾಮಾನ್ಯ ಜನರಿಗೂ ಸಹ ಮೇಲ್ನೋಟಕ್ಕೆ ಕಂಡು ಬರುತ್ತದೆ, ಇತ್ತೀಚೆಗೆ ನಮ್ಮ ಪತ್ರಿಕೆಯಲ್ಲಿ ಲಾಳಾಘಟ್ಟ ಗ್ರಾಮದ ಸೈಕಲ್ ಸ್ಟ್ಯಾಂಡ್, ಹರಿಸಂದ್ರ ಮತ್ತು ನೀಲಸಂದ್ರ ಗ್ರಾಮದ ಬಸ್ ತಂಗುದಾಣಗಳು, ಕನ್ನಮಂಗಲದ ಸರ್ಕಾರಿ ಶಾಲೆ ಹೀಗೆ ಎಲ್ಲಾ ಕಾಮಗಾರಿಗಳಲ್ಲಿಯೂ ದೋಖಾ ಮಾಡಿರುವುದು ಸ್ಪಷ್ಟವಾಗಿದ್ದು ದೂರು ದಾಖಲಾಗಿ ತನಿಖೆ ನಡೆಯುತ್ತಿದೆ.

ಇಂಥದ್ದೆ ಎರಡು ಪ್ರಕರಣಗಳು *ಹೊಂಗನೂರು* ಗ್ರಾಮದ ಸರ್ಕಾರಿ ಪ್ರೌಢಶಾಲೆಯ ಕಟ್ಟಡಗಳಿಗೆ ಸಂಬಂಧಿಸಿದಂತೆ ೨೦೧೭/೧೮ ರ ಸಾಲಿನಲ್ಲಿ ಸುಣ್ಣ ಬಣ್ಣ ಕಾಮಗಾರಿಗಳಿಗೆಂದು *೧,೫೦,೦೦೦* ರೂಪಾಯಿಗಳ ಒಂದು ಅನುದಾನ, *೯೦,೦೦೦* ರೂಪಾಯಿಗಳ ಮತ್ತೊಂದು ಅನುದಾನ ಪಡೆದು ನಯಾಪೈಸೆಯ ಕಾಮಗಾರಿಯನ್ನು ಮಾಡಿಲ್ಲ ಎಂದು ಮಾಹಿತಿ ಹಕ್ಕು ಕಾರ್ಯಕರ್ತ ವಿ ಜಿ ಕೃಷ್ಣೇಗೌಡ ದಾಖಲೆ ಸಮೇತ ಪತ್ರಿಕೆಗೆ ಮಾಹಿತಿ ನೀಡಿದ್ದಾರೆ.

೨೦೧೮/೧೯ ರಲ್ಲಿ ನ ಅನುದಾನ ಮಾತ್ರ ಖರ್ಚು ಮಾಡಿದ್ದು ೨೦೧೭/೧೮ ರ ಜಿಲ್ಲಾ ಪಂಚಾಯತಿ ಅನುದಾನ ದ ಹಣವನ್ನು ಗುತ್ತಿಗೆದಾರ ಅನಂತಕುಮಾರ ಬಿ ಟಿ, ಕಿರಿಯ ಇಂಜಿನಿಯರ್ ಶಂಕರ್ ಮತ್ತು ಅಂದಿನ ಪ್ರಭಾರ ಸಹಾಯಕ ಕಾರ್ಯಪಾಲಕ ಅಭಿಯಂತರರಾದ ಕುಮಾರಸ್ವಾಮಿ ಯವರು ಸಂಪೂರ್ಣ ಹಣವನ್ನು ದುರುಪಯೋಗ ಪಡಿಸಿ ಕೊಂಡಿದ್ದಾರೆ, ಕಾಲಮಿತಿಯಲ್ಲಿ ತನಿಖೆ ನಡೆಸಿ ಶಿಸ್ತು ಕ್ರಮ ಕೈಗೊಂಡು ದುರುಪಯೋಗ ಪಡಿಸಿಕೊಂಡಿರುವ ಅನುದಾನವನ್ನು ಮರಳಿ ಪಡೆಯಬೇಕೆಂದು ಜಿಲ್ಲಾ ಪಂಚಾಯತಿ ಮುಖ್ಯ ಕಾರ್ಯ ನಿರ್ವಹಣಾ ಅಧಿಕಾರಿಗಳಿಗೆ ದೂರು ನೀಡಿದ್ದಾರೆ.

ಕಿರಿಯ ಇಂಜಿನಿಯರ್ ಶಂಕರ್ ಕೇವಲ ೨೦೧೮/೧೯ ರ ಸಾಲಿನಲ್ಲಿ ಹೊಂಗನೂರು ಜಿಲ್ಲಾ ಪಂಚಾಯತಿ ವ್ಯಾಪ್ತಿಯಲ್ಲಿ ಈಗಾಗಲೇ *೧೩,೦೦,೦೦೦* ಲಕ್ಷಕ್ಕೂ ಹೆಚ್ಚು ಅನುದಾನವನ್ನು ದುರುಪಯೋಗ ಪಡಿಸಿಕೊಂಡಿರುವುದು ಮೇಲ್ನೋಟಕ್ಕೆ ಸಾಬೀತಾಗಿದ್ದು, ದೂರುಗಳ ಮೇರೆಗೆ ತನಿಖೆ ನಡೆಯುತ್ತಿದೆ. ಇನ್ನೂ ಹುಡುಕಿದರೆ *ಶಂಕರ ನ ಶಂಕರಾಯಣ ಅಥವಾ ಶಂಕರವತಾರ* ಎಂಬ ಬೃಹತ್‌ ಕಾದಂಬರಿ ಬರೆಯಬಹುದಾಗಿದೆ.

ಮುಖ್ಯಮಂತ್ರಿಗಳ ಕ್ಷೇತ್ರದ ಹೊಂಗನೂರು ಜಿಲ್ಲಾ ಪಂಚಾಯತಿ ವ್ಯಾಪ್ತಿಯಲ್ಲಿಯೇ ಇಷ್ಟೊಂದು ಹಗರಣಗಳು ನಡೆಯುತ್ತಿರಬೇಕಾದರೆ ಒಟ್ಟಾರೆ ಎಲ್ಲಾ ಜಿಲ್ಲಾ ಪಂಚಾಯತಿ ಗಳಲ್ಲಿ ಅದೆಷ್ಟು ಹಗರಣಗಳು ನಡೆದಿರಬಹುದು !?

ಸಂಬಂಧಿಸಿದ ಅಧಿಕಾರಿಗಳು ಶೀಘ್ರವಾಗಿ ತನಿಖೆ ನಡೆಸಿ ಸೂಕ್ತ ಕಾನೂನು ಕ್ರಮ ಕೈಗೊಂಡು ಹಗರಣದ ರೂವಾರಿಗಳಿಗೆ ಎಚ್ಚರಿಕೆಯ ಗಂಟೆ ಬಾರಿಸಲಿ.

ನಿಯಮಗಳ ಪ್ರಕಾರ ಯಾವುದೇ ಶಾಲೆಯಲ್ಲಿ ಕಾಮಗಾರಿ ನಡೆದರೂ ಶಾಲೆಯ ಮುಖ್ಯ ಶಿಕ್ಷಕರು ಮತ್ತು ನನಗೆ ಲಿಖಿತವಾಗಿ ಮಾಹಿತಿ ನೀಡಬೇಕು, ಆದರೆ ಪಂಚಾಯತಿ ಮತ್ತು ಗುತ್ತಿಗೆದಾರರು‌ ನಮ್ಮ ಗಮನಕ್ಕೆ ತರುವುದೇ ಇಲ್ಲ, ಇದರ ಬಗ್ಗೆ ಯಾವುದೇ ಮಾಹಿತಿ ಇಲ್ಲ.

ಸೀತಾರಾಮು ಕ್ಷೇತ್ರ ಶಿಕ್ಷಣಾಧಿಕಾರಿ ಚನ್ನಪಟ್ಟಣ

ಯಾವುದೇ ಅನುದಾನ ಬಿಇಓ ಅಥವಾ ಡಿಡಿಪಿಐ ಮನವಿ ಮೇರೆಗೆ ಬಿಡುಗಡೆ ಮಾಡುತ್ತೇವೆ, ಕೆಲವೊಮ್ಮೆ ಜಿಲ್ಲಾ ಪಂಚಾಯತಿ ಸದಸ್ಯರ ಮನವಿ ಮೇರೆಗೆ ಅನುದಾನ ಬಿಡುಗಡೆ ಮಾಡುತ್ತೇವೆ, ಸಂಬಂಧಿಸಿದ ಅಧಿಕಾರಿಗಳಿಗೂ ಮಾಹಿತಿ ನೀಡುತ್ತೇವೆ, ಹಲವಾರು ಕಾಮಗಾರಿಗಳ ಬಗ್ಗೆ ದೂರುಗಳು ಬಂದಿದ್ದು ತನಿಖೆ ನಡೆಯುತ್ತಿದೆ.

ಚನ್ನಪ್ಪ ಎಇಇ ಚನ್ನಪಟ್ಟಣ ಪಿಡಬ್ಲ್ಯೂಇ

ನಮ್ಮನ್ನು ಹೇಳುವುದೂ ಇಲ್ಲ, ಕೇಳುವುದು ಇಲ್ಲ, ಅವರ ಪಾಡಿಗೆ ಬಂದು ಕೆಲಸ ಮುಗಿಸಿ ಹೋಗುತ್ತಾರೆ, ಕಾಮಗಾರಿಯ ರೂಪುರೇಷೆಯನ್ಮು ಕೊಡುವುದಿಲ್ಲ.

ಕುಸುಮ ಮುಖ್ಯ ಶಿಕ್ಷಕರು ಹೊಂಗನೂರು ಪ್ರೌಢಶಾಲೆ

೨೦೧೮/೧೯ ರಲ್ಲಿ ಕೆಲಸ ಮಾಡಿದ್ದಾರೆ, ೨೦೧೭/೧೮ ರ ಬಗ್ಗೆ ಮಾಹಿತಿ ಇಲ್ಲ, ನಮ್ಮ ಗಮನಕ್ಕೆ ಬಂದಿಲ್ಲ.

ಪದ್ಮ, ಎಸ್ಡಿಎಂಸಿ ಉಪಾಧ್ಯಕ್ಷೆ ಹೊಂಗನೂರು ಪ್ರೌಢಶಾಲೆ

ಎಸ್ಡಿಎಂಸಿ ವತಿಯಿಂದ ಯಾವುದೇ ಕಾಮಗಾರಿ ಮಾಡಿಲ್ಲ, ಅವರು ನಮ್ಮ ಗಮನಕ್ಕೆ ತರುವುದೇ ಇಲ್ಲ, ನಾವೇನಾದರೂ ಕೇಳಿದರೆ ಕೆಲಸ ಮಾಡುವುದನ್ನೆ ತಡ ಮಾಡುತ್ತಾರೆ.

ವರದರಾಜು ಎಸ್ಡಿಎಂಸಿ ಸದಸ್ಯ

ಗೋ ರಾ ಶ್ರೀನಿವಾಸ...

ಮೊ:9845856139.